காணாமல் ஆக்கப்பட்டவர்களின் உறவுகளால் சர்வதேச சிறுவர் தினத்தில் போராட்டம் முன்னெடுப்பு...

 

சர்வதேச சிறுவர் தினமான இன்று முல்லைத்தீவு வலிந்து காணாமல் ஆக்கப்பட்டவர்களின் உறவுகளால் கவனயீர்ப்பு போராட்டம் ஒன்று முன்னெடுக்கப்பட்டுள்ளது.

1669ஆவது நாளாக தொடர் போராட்டம் மேற்கொள்ளப்பட்டு வரும் முல்லைத்தீவு காணாமல் ஆக்கப்பட்டவர்களின் உறவினர்களின் அலுவலகம் முன்பாக இன்று காலை 10 மணிக்கு இந்த போராட்டம் நடத்தப்பட்டதாக எமது செய்தியாளர் தெரிவித்தார். 

இறுதிபோரின் போது இராணுவத்திடம் சரணடைந்த நிலையில் குடும்பங்களுடன் காணாமல் ஆக்கப்பட்ட குழந்தைகள் மற்றும் சிறுவர்களுக்கு என்ன நடந்தது?, இராணுவத்தால் கடத்தி காணாமல் ஆக்கப்பட்ட குழந்தைகளுக்கு என்ன நடந்தது? உள்ளிட்ட கோஷங்களுடன் இந்த கவனயீர்ப்பு போராட்டம் மேற்கொள்ளப்பட்டுள்ளது.

 இதன்போது அண்மையில் ஜனாதிபதி, ஐக்கிய நாடுகள் சபையில், காணாமல் ஆக்கப்பட்டோர் விவகாரம் தொடர்பில் தெரிவித்த கருத்துக்கள் தொடர்பாக கடும் எதிர்ப்பு தெரிவிக்கப்பட்டதுடன், அதற்கெதிராக கோஷங்களும் எழுப்பப்பட்டுள்ளன.

கொட்டும் மழைக்கு மத்தியில் இந்த போராட்டம் முன்னெடுக்கப்பட்ட நிலையில், 10இற்கும் மேற்பட்ட புலனாய்வாளர்கள் போராட்டத்தை புகைப்படம் எடுக்கும் செயற்பாட்டில் ஈடுபட்டதாக எமது பிராந்திய செய்தியாளர் தெரிவித்தார்.