உலக சாதனை படைக்க காத்திருக்கும் கேன் வில்லியம்சன்!

இங்கிலாந்தில் நடக்கும் 50 ஓவர் உலகக்கோப்பை கிரிக்கெட் தொடர் நாளைய ஃபைனல் போட்டியுடன் முடிவுக்கு வருகிறது. இதில் இங்கிலாந்து, நியூசிலாந்து அணிகள் மோதுகின்றன. இரு அணிகளில் எந்த அணி வெற்றி பெற்றாலும், முத்ல் முறையாக கோப்பை வென்று சாதிக்கும். 

இந்நிலையில் இந்த உலகக்கோப்பை கிரிக்கெட் தொடரில் நியூசிலாந்து அணி அடித்த ரன்களில் பெரும்பாலான ரன்களை, அந்த அணியின் கேப்டன் வில்லியம்சன் தான் அடித்துள்ளார். 

இதுவரை 9 போட்டியில் பங்கேற்றுள்ள நியூசிலாந்து கேப்டன் கேன் வில்லியம்சன், 2 சதம், 2 அரைசதம் என மொத்தமாக 2 இன்னிங்சில், 548 ரன்கள் எடுத்துள்ளார். இதன் மூலம் ஒரே உலகக்கோப்பை கிரிக்கெட் தொடரில் அதிக ரன்கள் அடித்த கேப்டன் என்ற சாதனையை தற்போது முன்னாள் இலங்கை கேப்டன் மகேளா ஜெயவர்தனேவுடன் (548 ரன்கள், 2007) பகிர்ந்துகொண்டுள்ளார். 

இங்கிலாந்துக்கு எதிரான உலகக்கோப்பை தொடரின் ஃபைனலில் வில்லியம்சன் 1 ரன் எடுத்தால், ஜெயவர்தனேவின் உலக சாதனையை உடைத்து புது சாதனை படைப்பார். 

தவிர, இங்கிலாந்துக்கு எதிரான ஃபைனலில் வில்லியம்சன் சதம் அடிக்கும் பட்சத்தில் ஒரே உலகக்கோப்பை கிரிக்கெட் தொடரில், அதிக சதம் விளாசிய கேப்டன் என்ற கங்குலியின் சாதனையை (3 சதம்) வில்லியம்சன் சமன் செய்வார். 

தவிர, இந்த உலகக்கோப்பை தொடரில் அதிக ரன்கள் அடித்த வீரர்கள் பட்டியலில் இந்தியாவின் ரோகித் சர்மா (648 ரன்கள்), ஆஸ்திரேலியாவின் டேவிட் வார்னர் (647 ரன்கள்), வங்கதேசத்தின் ஷாகிப் அல் ஹாசன் (606 ரன்கள்) முதல் மூன்று இடங்களில் உள்ளனர். 

இங்கிலாந்தின் ஜோ ரூட் (549 ரன்கள்), நியூசிலாந்தின் கேன் வில்லியம்சன் (548 ரன்கள்) அடுத்த இரண்டு இடத்தில் உள்ளனர். இவர்கள் 100 ரன்களுக்கு மேல் அடிக்கும் பட்சத்தில் ரோகித் சர்மாவை பின்னுக்கு தள்ளி முதலிடம் பிடிக்கலாம்.